بحبك يا مصر

بَحِبِّكْ يا مصرْ..

وبعشقْ ترابكْ.

وألِفْ المداينْ..

وأرْجعْ لبابِكْ.

وأحِسْ بكيانى..

وكرامتى فْ رحابِكْ.

يقولوا فقيرة..

يقولوا أسيرة..

بشوفِكْ أميرة..

وأحبِّكْ يا مصرْ.

***

بحبِّكْ ملايه.. ومنديلْ بِقُويا.

مقالبْ من أختى.. وغتَاته مْنْ أخويا.

ودعوه مِنْ أمى.. تنسينى همِّى..

وحِكْمَه مْنْ أبويا.

وأحبِّكْ صبيِّه.. على البحرْ جايَّه..

فى ساعةْ عصَارى.

ونسمه قُبَالْها.. تطيَّرْ فى شالْها..

تبَيِّنْ جمالها.. وتِرجعْ تدارى.

وأحبِّكْ مراكبْ.. تعدِّى إللِّى راكبْ..

لبرْ الأمانْ.

يدوبْ جوَّا نيلكْ.. ويعطشْ يجيلكْ..

يقوللِّكْ كمانْ.

***

وأقابلِكْ ببُوسة.. فى زفِّةْ عروسة..

ولَمَّة في بيتنا..

مع ولادْ حارتْنا..

تدُقْ المزاهرْ.. ترُدْ المزامرْ..

تزَغْردْ جارتْنا.

نهلِّلْ.. نغنى..

وحلمْ التمنِّى..

ينورْ ليليتنا.

وأحبِّك زياره لبيتْ عمْ سيدْ..

ده أصله فقير مِشْ حيقْدرْ يعَيِّدْ..

نعَيِّدْ عليه.. نفرَّحْ عنِيهْ..

ويدعيلْنا دعوه بمليونْ جنيه.

***

فى أرضِكْ يحِسْ الغريبْ إنُّه مصري..

وإحنا الأجانبْ.

ويلْقَى الرعايهْ.. ويلْقَى الحماية..

على كلْ جانبْ.

ويمشى ف ربوعِكْ.. ويشبعْ بجوعِكْ..

ويعملْ مصايبْ.

ويرحلْ وينسى.. جِميلِكْ ويقْسَى..

ويطْلَعْ يعايبْ.

ويرْجعْ تسامْحى.. يا ساكنه فْ ملامحي..

يا سِتْ الحبايبْ.

***

ولادِكْ بَنُوكي.. بروحْهُمْ فَدُوكي..

ويِشْهدْ عليهمْ ترابكْ فى سينا.

ومنهُمْ با عوكى.. عشانْ الشِيروكِي..

وفيللا فْ مارينا.

يعيشوا فى خيرِكْ.. ويدُّوهْ لغيركْ..

ولادْ اللَّذِينا.

ولوْ جارْ زمانْهمْ.. يعودُوا لْمكانهمْ..

يلاقوا السَكينة.

وتِنْسِى جحودْهمْ.. وتبكى عليهمْ..

عنيكى الحزينة.

***

فى أرضكْ سرَحْتْ.. فشَلْتْ ونَجَحْتْ..

وعشْتْ بْبساطَة.

صاحِبتْ الحمَامْ.. ونِمْتْ فْ سلامْ..

ولوَْ عَ البلاطة.

تِغَيَّرْ فى شَكلي.. همومي ومشَاكْلي..

لكِنْ روحي لأْ.

أعَبَّرْ بغنْوة.. وأقولْ نُكتة حلوة..

لكِنْ يأسْ لأْ.

ما طيقْشْ الغَتاتة..

وقلبى المسالمْ ما يعرفْ شّماتة..

وأقولْ بالتلاتة..

بحبك.. بحبك.. بحبك يا مصر

نفسي أعرف مين كتبها

شاعر جميل بيقلد نجم